Manuel María

Este ano o Día das Letras Galegas está adicado a Manuel María.

CANDO O AUTOR FALA DE SI

                                                        Eu son de Outeiro de Rei

                                                        viliña da Terra Chá,

                                                        onde aprendí a viver

                                                        e a soñar con libertá.

                                                       Teño dous grandes amigos

                                                       de trato noble e sinxelo:

                                                       o caudaloso Pai Miño

                                                       e o regato de Cepelo...!

                                                      Vivín en Lugo algúns anos,

                                                      conseguín ser bachiller

                                                      e gastei a adolescencia

                                                      en troulear e escreber.

                                                      En Lugo atopei, pra sempre,

                                                      o meu amor, que é Saleta:

                                                     ¡Comigo a vida non puido

                                                     ser máis xentil e perfecta!

                                                     Casamos. Quixo o destino

                                                     -ou cecáis a nosa sorte-

                                                     que levemos moitos anos

                                                     con residencia en Monforte.

                                                     Nós sempre fomos galegos

                                                     sinxelos e verdadeiros,

                                                     soñadores, trotamundos,

                                                     editores e libreiros...

                                                     Profesión...¡procurador!

                                                     Ando a exercer coma tal

                                                     pro sempre usei dese oficio

                                                     dun xeito limpo e cabal.

                                                     Hai quen di que son autor

                                                     prolífico e incontinente.

                                                     ¡Ben o sinto!¡E teño mágoa

                                                     de non ser máis competente!

                                                    E aquí sigo: ledo, ufano,

                                                    satisfeito de estar vivo.

                                                    Mentras o tempo me gasta:

                                                    ¡paseo, leo e escribo...!